មូលដ្ឋានគ្រឹះនៃសេចក្តីជំនឿរបស់យើងរួមមាន
ព្រះត្រីឯក (ព្រះ៣អង្គរួមមកតែ១)
ព្រះជាម្ចាស់មានវត្តមានតាំងពីមុនពេលអ្វីៗទាំងអស់បានចាប់ផ្តើម ដោយទ្រង់មានបីអង្គ គឺព្រះវរបិតា ព្រះរាជបុត្រានាមថាព្រះយេស៊ូវគ្រីស្ទ និង ព្រះវិញ្ញាណបរិសុទ្ធ ។ យើងជឿថាព្រះវរបិតា ទ្រង់គឺជាព្រះដែលបង្កើតភពផែនដី ហើយមានព្រះវត្តមានយ៉ាងជិតស្និទ្ធជាមួយមនុស្សជាតិ ។ យើងជឿថាព្រះយេស៊ូវគ្រីស្ទ គឺជាព្រះរាជបុត្រានៃព្រះ ដែលបានយាងមកផែនដី ដើម្បីធ្វើជាព្រះអង្គសង្រ្គោះដល់លោកិយ ។ យើងជឿថា ព្រះវិញ្ញាណបរិសុទ្ធទ្រង់កំពុងតែបន្តព័ន្ធកិច្ចរបស់ព្រះយេស៊ូវលើផែនដីនេះ ។
(ម៉ាថាយ ២៨:១៩) ដូច្នេះចូរទៅបញ្ចុះបញ្ចូលឲ្យមានសិស្សនៅគ្រប់ជាតិសាសន៍ ហើយធ្វើបុណ្យជ្រមុជទឹកឲ្យ ដោយនូវព្រះនាមព្រះវរបិតា ព្រះរាជបុត្រា និងព្រះវិញ្ញាណបរិសុទ្ធ ។
សេចក្តីសង្គ្រោះ
យើងបានទទួលសេចក្តីសង្រ្គោះដោយសារព្រះគុណតែមួយប៉ុណ្ណោះ ។ យើងមិនអាចនឹងទទួលបានការសព្វ
ព្រះទ័យពីព្រះជាម្ចាស់តាមរយៈកិច្ចការណាមួយនោះឡើយ ។
(កាឡាទី ២:១៦) ប៉ុន្តែយើងដឹងថាមនុស្សបានរាប់ជាសុចរិតនៅចំពោះព្រះ ដោយអាងលើសេចក្តីជំនឿជឿលើព្រះយេស៊ូវគ្រីស្ទមិន មែនដោយអាងការប្រព្រឹត្តតាមក្រិត្យវិន័យឡើយ ។
គោលបំណង
យើងបានសង្រ្គោះដោយសារតែព្រះគុណ និងសម្រាប់គោលបំណងមួយដ៏ជាក់លាក់ ។ ព្រះជាម្ចាស់បានបង្កើតមនុស្សគ្រប់ៗគ្នាមក ដោយមានគោលបំណងនិងជាទីស្រឡាញ់របស់ទ្រង់ ហើយឲ្យពួកគេរស់នៅលើផែនដី សម្រាប់កិច្ចការមួយដ៍សំខាន់បំផុត ដែលនៅអស់កល្បជានិច្ច ។ ជីវិតមនុស្សទាំងអស់សុទ្ធតែមានតម្លៃ ចាប់តាំងពីពេលចាប់កំណើតមកម្ល៉េះ ។
(អេភេសូរ ២:១០) ដ្បិតយើងរាល់គ្នាជាស្នាដៃ ដែលទ្រង់បង្កើតក្នុងព្រះគ្រីស្ទយេស៊ូវសំរាប់ការល្អ ដែលព្រះបានរៀបចំជាមុន ឲ្យយើងរាល់គ្នាប្រព្រឹត្តតាម ។
អំពើបាប
អំពើបាបបានចូលមកក្នុងលោកិយនេះតាមរយៈការប្រព្រឹត្តរបស់មនុស្សដំបូង អ័ដាម ដែលមិនបានស្តាប់បង្គាប់ព្រះជាម្ចាស់ ។ ប៉ុន្តែយើងបានទទួលការអត់ទោស នៅពេលដែលយើងជឿលើព្រះរាជបុត្រានៃព្រះ ដែលនាមថាយេស៊ូវ ទ្រង់ត្រូវសុគតធ្វើជាយញ្ញបូជាសម្រាប់អំពើបាបរបស់យើង ។
(រ៉ូម ៣:២៣) ពីព្រោះគ្រប់គ្នាបានធ្វើបាប ហើយខ្វះមិនដល់សិរីល្អនៃព្រះ ។
ការអត់ទោស
អំពើបាបរបស់យើងត្រូវបានអត់ទោសទាំងស្រុងភ្លាមៗនៅពេលដែលយើងប្រែចិត្ត ។ ព្រះជាម្ចាស់ជ្រើសរើសលុបចេញគ្រប់ទាំង អំពើបាបរបស់យើងចេញពីការចងចាំរបស់ទ្រង់ ។
(យ៉ូហានទី១ ១: ៩) ប៉ុន្តែ បើយើងលន់តួបាបវិញ នោះទ្រង់មានព្រះហឫទ័យស្មោះត្រង់ ហើយសុចរិត ប្រយោជន៍នឹងអត់ទោសបាបឲ្យយើង ហើយនិងសំអាតយើង ពីគ្រប់អំពើទុច្ចរិតទាំងអស់ផង ។
ព្រះយេស៊ូវ
ព្រះយេស៊ូវគ្រីស្ទ ទ្រង់ជាព្រះរាជបុត្រាតែមួយអង្គគត់របស់ព្រះជាម្ចាស់ ដែលត្រូវបានយាងមកយកកំណើតដោយព្រះវិញ្ញាណបរិសុទ្ធ ហើយប្រសូតមកពីស្ត្រីព្រហ្មចារីយ៍ឈ្មោះថា ម៉ារា ។ ព្រះអង្គត្រូវបានគេឆ្កាង រួចក៏សុគត ហើយត្រូវបញ្ចុះក្នុងផ្នូរ ។ ប៉ុន្តែ បីថ្ងៃក្រោយមក ទ្រង់បានរស់ពីសុគតឡើងវិញ ហើយបានយាងទៅឯនគរស្ថានសួគ៌វិញ ជាកន្លែងដែលទ្រង់គង់នៅខាងស្ដាំព្រះវរបិតា ។
(កូរិនថូសទី២ ៥:១៥) ទ្រង់ក៏បានសុគតជំនួសមនុស្សទាំងអស់យ៉ាងនោះ គឺដើម្បីឲ្យពួកអ្នកដែលរស់នៅ មិនរស់សំរាប់តែខ្លួនឯងទៀតទេ គឺរស់សំរាប់ព្រះអង្គ ដែលសុគតជំនួសគេ ហើយបានរស់ឡើងនោះវិញ ។
ព្រះគម្ពីរបរិសុទ្ធ
ព្រះគម្ពីរ ត្រូវបានបណ្តាលឡើងដោយព្រះជាម្ចាស់ ហើយជាសិទ្ធអំណាចតែមួយគត់នៃការសម្រេចព្រះទ័យរបស់ព្រះអង្គ ។
(ធីម៉ូថេទី២ ៣:១៦) គ្រប់ទាំងបទគម្ពីរ គឺជាព្រះទ្រង់បានបញ្ចេញព្រះវិញ្ញាណបណ្តាលឲ្យតែងទេ ក៏មានប្រយោជន៍សំរាប់ការបង្រៀន ការរំឭកឲ្យដឹងខ្លួន ការប្រដៅដំរង់ និងការបង្ហាត់ខាងឯ សេចក្តីសុចរិត ។
ការរៀបអាពាហ៍ពិពាហ៍
អាពាហ៍ពិពាហ៍ គឺជាកិច្ចព្រមព្រៀងរវាងបុរសនិងស្ត្រីដើម្បីឲ្យមានជីវិត ។ ការរួមមេត្រីត្រូវបានបម្រុងទុកក្នុងចំណងអាពាហ៍ ពិពាហ៍ ។
(លោកុប្បត្តិ ២:២៤) ហេតុនេះហើយបានជាបុរសត្រូវចាកចេញពីឪពុកម្តាយរបស់ខ្លួនហើយទៅនៅជាប់នឹងប្រពន្ធរបស់ខ្លួនវិញ នោះពួកគេក៏បានក្លាយជាសាច់តែមួយសុទ្ធ ។
ពិធីជ្រមុជទឹក
ពិធីជ្រមុជទឹក គឺជាការប្រកាសជាសាធារណៈអំពីការសម្រេចចិត្តរបស់យើងក្នុងភាពជាគ្រីស្ទបរិស័ទ ។
(ពេត្រុសទី១ ៣:២១) ដែលទឹកនោះហើយ ជាគំរូពីបុណ្យជ្រមុជ ដែលជួយសង្គ្រោះអ្នករាល់គ្នាសព្វថ្ងៃនេះ មិនមែនជាការសំអាតក្អែលរបស់រូបសាច់ចេញទេ គឺជាសេចក្តីសន្មតិរបស់បញ្ញាចិត្តដ៏ជ្រះថ្លាចំពោះព្រះវិញ ដោយសារព្រះយេស៊ូវគ្រីស្ទទ្រង់មានព្រះជន្មរស់ឡើងវិញ ។
ពិធីជ្រមុជដោយព្រះវិញ្ញាណបរិសុទ្ធ
ព្រះវិញ្ញាណបរិសុទ្ធសព្វព្រះទ័យប្រទានអំណាចទ្រង់ទៅកាន់គ្រីស្ទបរិស័ទគ្រប់ៗរូប តាមរយៈការជ្រមុជដោយព្រះវិញ្ញាណបរិសុទ្ធ ហើយបន្ទាប់មកក៏នៅតែបន្តចាក់បំពេញដោយឥតឈប់ឈរ ។ នៅក្នុងគោលបំណង គឺប្រទានឲ្យយើងនូវអំណាចដ៏ខ្លាំងអស្ចារ្យដើម្បីផ្សាយដំណឹងល្អ និង ព្រះចេស្តានៃការព្យាបាល ។
(កិច្ចការ ១: ៨) ប៉ុន្តែ កាលណាព្រះវិញ្ញាណបរិសុទ្ធបានមកសណ្ឋិតលើអ្នករាល់គ្នា នោះអ្នករាល់គ្នានឹងបានព្រះចេស្តា ហើយនិងធ្វើជាទីបន្ទាល់ពីខ្ញុំ នៅក្រុងយេរូសាឡិម ព្រមទាំងស្រុកយូដា និងស្រុកសាម៉ារីទាំងមូល ហើយរហូតដល់ចុងផែនដីបំផុតផង ។
ក្រុមជំនុំ
ក្រុមជំនុំ គឺជាទីកន្លែងដ៏បរិសុទ្ធមួយដែលត្រូវបានបង្កើតឡើងដោយព្រះយេស៊ូវ ដែលនឹងយាងត្រលប់មកវិញនៅថ្ងៃណាមួយសម្រាប់ កូនក្រមុំរបស់ទ្រង់ គឺក្រុមជំនុំ ។ គោលបំណងនៃក្រុមជំនុំគឺដើម្បីចែកចាយដំណឹងល្អ ថែរក្សា និង លើកទឹកចិត្តដល់គ្រីស្ទបរិស័ទដទៃទៀត ព្រមទាំងជះឥទ្ធិពលទៅដល់ពិភពលោកទាំងមូលជាមួយនគរព្រះ ។
(អេភេសូរ ២: ២០-២១) ដែលបានស្អាងឡើងលើជើងជញ្ជាំងនៃពួកសាវ័ក និងពួកហោរា ហើយព្រះយេស៊ូវគ្រីស្ទនោះឯង ទ្រង់ជាថ្មជ្រុងយ៉ាងឯក ដែលដោយសារទ្រង់ ដំណាក់ទាំងមូលនោះបានផ្គុំភ្ជាប់គ្នា ទាំងចំរើនឡើងជាវិហារបរិសុទ្ធក្នុងព្រះអម្ចាស់ ហើយអ្នករាល់គ្នាក៏បានស្អាងឡើងក្នុងទ្រង់ដែរ សំរាប់ជាលំនៅនៃព្រះដោយនូវព្រះវិញ្ញាណ។